Hasonangkon ma parbue ni halojaonmu. Basabasa ni Debata do i.

Almanak Kamis 22 Juli 2010:

Angkup ni tahe manang ise jolma na mangan dohot na minumi dohot marnida na denggan marhite sian ulaonna, silehonlehon ni Debata do nang i. (Parjamita 3:13)

Na mulaulaon do Debata jala hita pe ingkon mulaulaon ma. Ndada holan di mulana i, ima di tingki panompaon langit dohot tano on, mangula Debata, alai sahat tu tingki on mangula dope Ibana. Ai tu Debata na na ringgas jala na nunut mulaulaon do porsea hita, ndada tu debata na holan hundul marlembalemba dohot marsonangsonang. Siala holongNa na balga i las do roha ni Debata marhoi laho manarihon jala marmudumuduhon ngolunta. Ala nii hita pe sai tahalashon ma manghalojahon ulaonta laho manarihon dirinta dohot sude na adong di hita.

Hombar tusi, ndang sintong molo rajumonta songon siuhuman na mulaulaon laho manggohi nasa na ringkot di ngolunta, nang laho mambahen tandi hadirionta, nang laho pamajuhon ngolu ni natorop pe. Basabasa na sian Debata do i. Ido na patauhon hita sai tongtong padot, hiras jala hinsa mangula angka siulaonta i.

Alai ndang holan laho manghalojahon ulaonta dijouhon Debata hita, dohot do laho mandai manang manghalashon parbue ni halojaonta i. Songon na nidok ni Apostel Paulus: Ingkon siula hauma i jumolo taruli di parbuena! (2 Tim 2:6). Pos ma rohanta ndang hea magopo sude ulaon na tahaburjuhon di bagasan hapodoton, roha na lidang dohot tangiang. Jala marhak do hita manghalashon parbue ni haburjuan na mangula i.

Alai taingot ma, ndang holan di dirinta sambing hita mangula. Dphot do diijouhon Debata do hita asa olo loja laho sumarihon ngolu ni angka ianakhonta dohot sundut na naeng ro. Ai i do diula natorasta dohot ompunta najolo. Nasida na manuan alai hita do na manganhon. Hita saonari pe: tasuan ma na denggan asa taruli angka anakhonta haduan.

Tangiang:
Ale Debata, sai sosoi ma hami asa lam tu ringgasna jala tu padotna hami mulaulaon. Pasupasu ma sude usaha dohot gogonami mambahen lam tu dengganna hangoluan on. Sai padao ma hami sian pandelean. Baliksa, urupi ma hami asa tongtong marhiras jala marlas ni roha mangula. Jala lehon ma di hami tingki nang gogo laho mandai dohot manghasonangkon sude parbue ni halojaonnami i. Di bagasan Kristus. AMEN.

Mulak tu alaman parjolo: