Marende Sagogogona? Asi rohamuna di iba. :-)
KURSUS BAHASA BATAK : 
Oleh: Pdt Daniel T.A. Harahap
Dua hali marpesta dua hali ingkon mangallang ubat. Ue paet ni ngolu on. Aha do huroha na masa? Topet di ari mangulon nantuari dua hali ma iba tu ulaon ni halak hita. Sada ma i pesta bona taon sadanai “mangan bodari” laho papunguhon dana huria. Mansai las do roha sasintongna boi mandohoti dua ulaon i, lumobi ala pajumpang iba dohot angka sisolhot nang aleale. Sipanganonnna pe mansai tabo muse do. Jadi aha do na hurang? Musik dohot endena i pagogonghu. Sahali nari ma hudok: musik dohot endena i pagogonghu!
Nunga leleng huparateatehon jala sai sungkunsungkun do di bagasan roha niiba: boasa halak batak (di jaman na maju on) molo marende ingkon sagogogogona? Boasa ingkon disetel sipargogo soara manang “loudspeaker” i satimbotimbona? Sai hira na dipaksahon jala dionjathon nama ende nang musik i bongot tu pinggol eh santabi sipareoniba. Hansit. Ujungna tok ma simajujung. Simalolong pe sipata gabe homur. Jala simangkudap ndang sonang be manganhon lompan i.
Sasintongna tujuan niiba laho tu pesta rap marlas ni roha do hasuhutan jala pajumpang dohot angka dongan nang tondong. Ndang hinata di huta na ribur on sipata mansai maol do pajumpang angka na marhahamaranggi na mariboto. Di pesta ma tingki pajumpang. Alai ala ni ende dohot musik na super gogo ini ndang boi be iba manghatahatai. Tarpaksa ma iba mauhom jala tarhatotong sambing.
Mangihuthon pandapothu, ingkon sungkunonta do angka psikolog (parhapistaran di parrohaon) manang antropolog (parhapistaran di gulmit ni hajolamon) taringot tu na masa on. Aha do alana? Aha do sibonsirina? Najolo niingot ndang songon on halak batak marende. Ende ni si Nahum nang group ni Amanta Gordon Tobing mansai tabo do tu pinggol jala lambok di pusupusu. Ndang mambahen mallobuk taroktok songon di jaman na maju on.
________________________
Angka istilah:
topet = persis
mangulon = istirahat
mandohoti = mengikuti
pajumpang = berjumpa
sisolhot = saudara dekat
aleale = sahabat
hu = terlalu (pagogonghu = terlalu kuat)
sagogogogona = sekuat-kuatnya
satimbotimbona = setinggi-tingginya
dionjathon = dijejalkan, dipadatkan
bongot = masuk
pinggol = kuping (dalam bahasa batak kurang sopan menyebut anggota tubuh secara langsung)
sipareon = kuping (istilah halus)
tok = pusing, sakit kepala
simajujung = kepala (istilah halus)
simalolong = mata (istilah halus)
homur = kabur
simangkudap = mulut (istilah halus)
lompan = lauk
hasuhutan = tuan rumah
tondong = sanak saudara
ribur = ramai
mauhom = diam
tarhatotong = terheran-heran, terpelongo
siala = penyebab
sibonsiri = penyebab
pusupusu = jantung
mallobuk taroktok = berdebar-debar denyut jantung
March 27th, 2009 at 10:29 am
Ido nian amang mansai tok ulu molo tu pesta, ala pas mai ikkon gogo do huroa , molo alunan lembut musikna annon gabe ndang tarbege jala mondok - undok ma annon parhata :), alana halak hita molo mangkatai gogo do suarana, jadi ikkon musik keras, molo musik rock do gabe marjingkrak jingkrak ma annno angka naposo
he.he..he
March 27th, 2009 at 11:05 am
tingkos hian do na nidok ni amang i, ia iba pe nasaleleng on songon na heran do alana boasa pola sai maradu gogo dibaen soara ni loudspeker i, sampe naing ma pocca nama perasaan niba pinggol niba ala ni suara ni musik dohot namakkatai i.
jala muse akka parmusik i, saonari hira holan sammacam di boto, dang dibaen be sipata boha nian maksud nilagu i, lambok dohot gogo dang di bedahan sehira na marembas sude, tangis pe di embashon,mengkel,marsak sude…sehira naso adong be na lambok di angka parende i, dohot na lungun.
muse nungnga asal di pambaeni be laguna dang di pasoksok be tu keadaan ini, ende di tingki pangolion alai di endehon do ende ni na putus cinta dohot ende ni nama balu…, musik manjou hula-hula ninna alei di baen musik dohot lagu na so hobar tusi jadi nungnga marambalangan sipata.
Alai godangan di parserahan on do songoni molo lao hita tu arah barus ,sibolga molo mandok hata nasida di pesta tung mansai lambok jala tabo do begeon, dang pola di pagogo be soara nai alana nungga adong mik, suang songoni muse tu arah sionom hudon, pakkat parlilitan,tara bintang, lambok-lombak do tong ni bege.
jadi tu angka raja parhata sude halak batak porlu do ra nasida mereka cara manghatai nasida denggan do jala tabo do begeon hape godang do halak hita jadi MC terkenal,pembawa acara terkenal tabaen ma attong songoni aturan ni namakkatai i asa tung tabo begeon.
Jala pesta ni hita batak on memang pesta na paling ribut ,tabereng ma da, tingki selesai mangan di jaha ma jabbar,pas waktu i muse, di jaha siboan dekke, tabba muse ribut ni jolma sun…aha ma dang rukkar angka sahit ni parsahit..siallangon pe ba holan i torus namarmiak-miak i, ai molo di baen na asing pintor di bukkusi angka inanta doi, agia dang dope selesai mangan,jadi nungnga lam lumlam be..
March 27th, 2009 at 1:00 pm
molo di pesta ndang gogo soara ni ende i gabe ndang seru amang
alai tergantung do molo tabo soarana dan sinkron tu musik i pasti ndang haccit pinggol mambege..
ikkon bahenon gogo asa ro iba manortor
Daniel Harahap:
Dua minggu na salpu margondang hami di Serpong. Gogo hian do soara ni taganing dohot sarune i. Alai ndang hansit sipareon. Boasa? Ala di alaman do hami margondang jala nunga pinangido asa disetel soundsystem i. Alai molo binege soara ni ende batak di ruang na huphup nuaeng on mangido ampun do iba. Dohot jempek dohonon ma tu dongan parende: antan hamu saotik. So ala ni gogo na mangolu on Lae.
March 27th, 2009 at 2:27 pm
on do sada hahurangan bolon di halak hita, tarlumobi tu akka namamukka ulaon namargoar hiburan, ala so pola ta parate atehon akka aha do narikkot tu ulaon i, isarana pahobashon ula ula na marsidohot di ulaon i.
na tuani ma amatta pandita manusoi sisongon on, alana songon iba sahalak sipambege bege ende nungnga tung apala leleng naeng niultop hon. alai sai hera situtung ulok ma iba molo nidok dang adong alana.
molo naniattusan, molo na adong do parende naeng mangaopi ulaon i, suman ma nian dibaen dohot ula ula nasida :sound system: dohot sdm na, asa suman begeon, hu hilala parende ipe lobi songon sogo ni roha ni namambege panghilalaan ni nasida.
tuani ma….
March 27th, 2009 at 3:11 pm
Huuji ma jolo mamereng sian “sudut” na asing ate amang, boasa ingkon gogo? Alana nunga tung songon i pe gogoni suara na sian “loudspeaker” i, mansai godang dope sian situan natorop i na lalap di parnonangon, ndang dianturehon be mata ni pesta i, hape na laho mamereng pesta adat do nasida ro tu pesta i, ndada na laho marnonang, ba molo naeng marnonang do antong, ba jolo simpul ma jolo antong pesta i. Ala ni hasomalon di pesta si songon on do ra umbahen na sipata tarboan-boan tu parmingguan, di piga-piga inganan sipata masa do sai marnonangi angka ruas tu na di sabola hambirang manang siamunna. Tarlumobi ma molo tingiki : umbege paduan suara, tinting dohot jamita! I ma ra na umbahen ingkon gogogogo soara di pesta ni halak Batak. Alana humurang do dengganna molo pinatupa parendeon, manang na lagi marsintuhu panghataion adat, alai situan na torop ndang adong na umbegesa. Boi do ra hilalaon ni halak amang sisongon i, molo tingki marjamita halak amang di langgatan i, alai torop ruas manghatahatai, antar songon i do ra umbahen na ingkon gogogogo soara di pesta Batak i. Boha ma bahenonta pauneunehon i? Didok rohangku, ba ingkon sian hita do mamulai, na marlapatan, molo tingki marende manang tingki marsintuhu panghataion ba unang ma antong hita lalap marnonangi hita sama hita. Songon i ma jolo amang sian ahu (na so ahli Sosiologi manang antropologi) holan na lomo do rohangku mamerengmereng angka jolma dohot angka aha naniulana.
Daniel Harahap:
Molo marjamita iba boi dokhonon ndang apala hea binereng ruas manghata-hatai. Hohom do sude nang pe so apala gogo soara niiba. Ra ala jempek jamita i. Manang ala ni janggut i do i?
March 27th, 2009 at 3:58 pm
Sada hasomalon diau molo naeng tu pesta pintor hulului do donganku sahundulan nasarupa dohot hasomalonku ima asa dao sian speaker nangpe ala ni parhundulon ingkon jonok tusi alai dang olo au hundul disi dang tahan au amang umbegesa molo sahat iba dijabu nga toe hansit tanggurung ala ni leleng na hundul hansit muse dohot ulu gabe muruk2 iba.
Naunggeok molo taon baru dahot natal di gareja nami ingkon disewa do/ditambai speker asa tung keren(uli do haroa dirohani angka pangula) hape mulak iba sian gareja gabe tok do ulu alani speker i hape dung parmingguon borngin ala martugas ianakkonku dang disi be speker i gabe ulima pelayananna, jadi nahodok nang pe par metropolitan huria nami huta2 dope cara marpingkirna, ingkon parmingguon arian i do porlu gogo2 asa tung hebat molo botari ala gumodang naposo dht remaja ba dang porlu parrohahonotton i( hape gabe ido na lambok) he… he kasian deh.
March 27th, 2009 at 5:57 pm
Hahahaha, songon naung ta bahas na bodari di fesbuk, ra nunga gabe hasomalan nama di hita halak batak ia molo marmusim dohot marende ingkon mansai gogo. Iba pe ndang tangkas niboto aha alana, alai ra holan asa dibege jolma do musik dohot naniendehononna i, ala ditingki si songon i ndang pola piga-piga halak na olo mambege jala mangihuthon musik dohot parende naung jongjong di jolona. Ba ingkon gogo ma bahenon musik i asa dibege jolma na huhut sai marnonangi di pesta manang ulaon i.
Alai memang ingkon porlu do tabereng kesehatan ni dongan na umbegesa, molo gabe pagogohu, ingkon dipanenget, jala molo memang hurang tarbege boi ma tapagogo. Unang gabe mangorui lapatan jala nikmat i ulaon i, jala unang alani musik gabe marsahit huhut mangallang ubat jolam na mulak sian pesta i, songon amang DTA, ndang songon i amang?
March 27th, 2009 at 6:06 pm
Komentar ni iba taringot tu tulisanmuna on, panditanami, adong do pardomuanna tu tulisanmuna nantoari sada ima MARENDE : HASOMALAN MANANG HASINTONGAN?
Ala nunga tapasomal-somal gogo soaranta tingki manghatai ujungna tingki marende pe tong gogo soaranta laho mangendehon ende i. On ma deba na mambahen sogo roha ni halak dison mamereng halak hita: Gogo soarana tingki manghatai, gogo soarana tingki marende di lapo bahkan sampe teriak-teriak. Ai so na gogo ni soara i na mambahen halak sonang mambege lagu na taendehon. Not, hatahatana, dinamika (forte, piano) manang harmonisasi lagu i do na mambahen uli sada lagu. Ndada gogo ni soara na mangendehonsa. Ido na sintong.
Alani i asa sonang roha ni halak mambege, ta mulai mangulahon angka na sintong i ima lambok-lambok manghatai. Jala unang ma taulahon angka na somal taulahon na saleleng on, ima gogo-gogo soaranta tingki manghatai.
March 27th, 2009 at 10:41 pm
Otokritik sisongon on nunga ingkon surathononta di surat kabar na jinaha ni raja-raja Batak si atur acara.
Alai so jo. Songon i do tong gunturna pesta adat di Karo, Mandailing, Simalungun; manang holan di Batak Toba do songon i?
Nantuari sada uju mardalan adat Simalungun di hamomonding dainang pangintubu ni Pdt. Martin Lukito Sinaga, biasa do soara i, gemulai nang tortor Simalungun i.
March 28th, 2009 at 8:05 am
Satolop ;na denggan usul mi amang Panditanami. Hampir sude do dongan mengeluhkan masalah on.
Di sada pesta adat Batak di Balai Sudirman , antara lain di hadiri Presiden, dipangido suhut do dohot gomos asa unang pagogo hu soara (musik, ende dll). Boi do ;denggan ;nyaman. Boi iba mangkatai dohot dongan.
Tatiru ma nadenggan i;
Tamba ni i: pesta tempat bersosialisasi;kesempatan yang langka bagi kita di Jakarta untuk ketemu handai tolan; . Nunga hundul marjomjom; mangkatai pe dang boi ala ni gogo ni musik/soara. Amang,hansitnai. Tapature ma i amang.
Horas ma tondi madingin !
March 28th, 2009 at 11:38 am
Ha………..ha ……….. ido amang molo so gogo dang halak batak i,……. molo lambok2 do musik na maoondok-ondok ma anon. Na jelas nga bergeser be jaman i. Ima tusi.
Daniel Harahap:
Asal ma gogo ni soara i ndang panombosan.
March 30th, 2009 at 9:27 am
Ido hebatna, molo di ulaon ni halak hita, ndang marlaku pandohan”panuhor do raja”, ai gabe hira parmusik i do nampuna ulaon. Sasintongna marhuaso do na manggarar mangatur na ginararna, alai nunga gabe tarbalik, gabe lomolomo ni parmusik do di ulaon i. Jala sisongonon ndang holan di Jakarta masa alai di pigapiga kota tarmasuk ma di Surabaya. Molo boi ba di bahen amang Sinamo ma nian artikel di surat kabar taringot pangalaho sisongoni.
March 31st, 2009 at 11:41 am
Haaa…..haaaaa…haaaa!!!!!!!!!!!!, Gingging au mengkel hujaha tulisan ni Amang DTA on. Alana nungga manang na piga hali hualami na sisongon on di pesta ni halak hita nahuadopi, bingun do iba, ai na behado nuaeng sipareon ni angka dongan on ninna roha, naso pusing do mambege soara ni na maniop mike dohot na marende i?
Ah tahe, sipata gabe songon na mandarat ma iba tu luar ni gedung. Hir hodok jala songon na pusing.
Molo huhilala, sude pardalanan ni acara i tergantung tu MC (Manang na protokol do). Molo sai marsuraki do protokol i, dang adong seni ni na mangkatai, ba sude do marsuraki, alai molo boi do MC manang na protokol memanage acara i, boi do denggan. Hea hodohoti sahali pesta ni halak hita boi do songon na lambok, alan mc na pe boi mangatur situasi i. Ndang di pungga mangkatai alai dibahen ibana tempo.
Mungkin tu generasi na umposo ma ra taharappon ate, asa songon na un lambok, alana maol do marsiajar dung matua. Ai adong do nang songoni parompungon sian ripengku, ai molo mangkatai pe ompung on sai songon na muruk manang na marbada do torus, hape nian na kebiasaanna do. Jadi mono tarsor pajumpang di ulaon, holan ni jalang ompung on antar songon na pinadao do parhundulon, jala molo dipahombar ba paula ma sai songon na adong nibahen kesibukan niba, ai tung mansai gogo do soarana.
Mauliate ma amang Pdt. DTA, tarjaou hamu laho mangkatahon angka nahumurang i asa tu dengganna.
Sahali dope hubege amang marjamita di huria nami, HKBP Jati Asih - Bekasi, alai songon na lambok jala masuk nihilala hata ni Tuhan i dipatolhas amang. Horas ma ate amang, panjang umur hamu jala hipas-hipas. Labu tu dengganna pelayanan ni amang. Horas ma hita saluhut na di rumametmet on. Mauliate
March 31st, 2009 at 2:41 pm
bohama dohonon amang. nga tradisini pesta halak hita si songoni, alai anggo menurut au nian denggan do di rubah angka sisongoni, terutama na paling berperan nian tusi ima akka raja adat, raja hata dohot hasushuton asa molo mambaen pesta asa dikonsep acara i lebih terstruktur tanpa mengurangi nilai2 budaya batak
Songoni tu akka parende di pesta asa lebih ditingkathon nian kemampuan na ber adaptasi dohot tempat ulaon
April 8th, 2009 at 6:30 pm
Kalo mau Kamus Batak :
http://web.tiscali.it/batak/kamusa.htm
utk mendapatkan kata dalam huruf lain , ganti saja text ” kamusa” menjadi “kamusb, kamusc , kamusd–until– kamusw “
April 9th, 2009 at 3:46 am
Pak/Amang Sam,
Mauliate di informasi muna on. Mauliate godang.
Horas
April 28th, 2009 at 10:20 am
Taringot tu gogoni soara…hea hujaha buku /tulisan namambahas i (alai lupa bukui ) didok disi najolo Oppungta sijoho2 tubu tinggal di Toba namarbukit2/gunung (dolok2), karejo ni halak i godang do marmahan, jadi diparmahanan…angka parmahan i manjau donganna, ala dao2 do nasida ingkon gogo hian do soarana asa tarbege, songoni mese dungsahat dihuta manjou pinahan babi na,hurjeee…!!! hurjeee !!! ingkon gogo hian do asa ibege sihurje (babi) i, ai… lao do hurjei tu pollakni …..sintua …i,hehehehe, gabe tarboanma i..sian balian/parmahanan tu jabu, sian jabu tupesta…ala naung sude mangkatai,molo nenget soarani loudspeakeri gabe dang tarbegebe, alai unangma nian sahat tu gareja parmingguan, apalagi ditingkion nungnga godang angka halak hita naung tubu dikota, unangbe nian songoni. Ima saotik sian au,horas ma dihita sude.
mauliate.
May 1st, 2009 at 9:26 am
Songoni ma antong na masa di hami di Palembang, di huta nami i di Palembang adong do Gedung Serba Guna Yapon (Yayasan Ompu Nomensen), gedung on sasintong na punasa ni HKBP Palembang. jala inganan na di kompleks gareja i do. Ganup Jumat dohot Sabtu ndang hea mansohot dipakke halak hita marulaon adat, sipata ditingki na parpudi on olo do ari Kamis pe laos dipakke dongan do . Gedung i marhombar balok tu gareja Katolik St. Joseph. Sai jot jot ma hombar balok i marpangidohon (potes/komplain) molo nunga dapot pukkul 5 sore asa dipametmet ma soara ni musik, ala ditingki i nasida marulaon ” misa”, tarlumobi ma di ari Sabtu. Nang songoni pe hombar balok na asing marpangidohon molo dapot tingkina shollat Jumat asa soara na sian gedung i dipametmet. Ala ni i uluan huria (pandita ressort) sebagai na bertanggung jawab tu sude parartaon ni huria mambahen soso asa molo nunga dapot tingki shollat Jumuat dohot di ganup pukul 5 sore ingkon mansohot ma jolo soara ni musik. Ala i ndang tarjalo angka dongan soso i. Na hebat na alus na sida, “manggarar do hami mamangke gedung on, boi do lomo-lomo nami”. I ma na masa di hami di Palembang. Tu jolo ni ari on tu sude dongan na mamangke gedung i (hasuhuton dohot na manjalo gokhon /jou-jou) olo ma nian mangaradoti tarlumobi soara ni musik “molo dapot tingki na.” Nang songoni pe tu uluan huria dohot ama / ina nami na mangaradoti parartaon huria asa dipingkiri na hombar tu paturehon sound system na boi mambahen sonang na mamangke gedung dohot hombar balok. Boti ma
May 5th, 2009 at 1:52 pm
Di Jakarta, tung mansai maol be panangethon angka soara, huroha angka pinggol(sipareon) ni halak hita na tabo mambege i nungga mansai hapal be, anggo pangkilalaana mansai halus do i. berengma molo halak hita marhusip hape tarbege do tu dongan na asing.
Sude acara musik i , tu suhut na mangantusi ma mangatur tu parmusikna dohot parhatana, songoni nang pengelola gedung ingkon bahenonna nama peredam soara, jala gedung na pe ingkon tartutup. Molo saonnari pinggol(sipareon) ni jolma na di luar gedung do gabe sega molo mambege musik dohot soara na dibagasan gedung i alani angka hapal ni si pareon.
(godang do halak hita nuaeng ndang polo lomo rohana mambege soara na mansai gogo/kasar). horas
June 5th, 2009 at 9:39 am
molo manurut ahu hira hira songonnon do :
- Asa unang tarida do akka suara ni paredde i na Fals jadi dipagogo ma
sound system na i.
- Alana godang do paredde saonari holan namarsuraki do diboto.
- Molo edde na lembut dang diboto mamboatton
- Eddena pe dang di sesuaihon tu acarana.
- Asalma tampil.
- Mauliate
June 10th, 2009 at 1:41 pm
Marminggu ma hami tanggal 7 Juni di HKBP Riau Bandung, masuk ma jam : 17.00, memang hami tarlambat masuk, tingki mardalan do pe hami nungnga mansai hansit pinggolhu mambege soara ni musik terutama suara Drum na mallatanglatang. Parjamita hundul jonok tu par musik, nungnga mansai humosing parhundulna jala simajujungna ndang tenang be, gari hami tutu hundul ditongatonga pinggolhu nungnga mansai hansit umbegesa, par drumnai anakmuda kelahiran Bandung do jadi ndang holan na sian hitaan be na lomo rohana membege soara na gogo.
Gabe dibaen amang pandita ma songonon contoh Jamita : Martangiang ma sada halak manjou Tuhan mansai gogo/kasar ima Tuhan…..n, alani gogo ni soarai olo ma ro alus ni Tuhan , gogonai soarami, hubege do jala pananget saotik? hape na martangiang on tutu ingkon demak, dame, hohom, elek asa ro tutu angka pasa-pas ui.
manang adong sada anak manjou inongna mansai gogo, Inong…g , manang mama….aaa, ro ma alus ni inong na on songonon: dirimpuhodo ahu na nengel manang na tungkihon? pananget soarami . Marpingkir ma antong anakna on, olo tutu ingkon paubaon do soara laho manjou : inong/mama mansai lembut. pintor dialusi inongnaon do antong hatop dohot alusna : aha amang/olo amang aha naeng sibahenongku di ho ? tabonai alus ni inongtai ate molo soara ni anakna mansai hormat, sopan, nanget.
Jadi tapadenggan ma soarani parmusik i ate, asa boi hita dibagasan dame/habengeton manjalo tondi parbadia i jala boi muse denggan mambege jamita, unang ma tapasomal soara ni musik mallatang-latang di Gereja, jala molo boi nian dumenggan do soara instrumental tingki saat teduh. horas ma
November 10th, 2009 at 3:20 pm
Ai songon na sepi do namarhata batakon, bohado angka anak muda nasoadong do topik ? bohama molo tabahas istilah Pesta Gotilon di Hurianta. Molo di huta pesta gotilan dipatupa do sahali sataon laho papunguhon sebahenon na porlu tu Huriai, alai heama di Huria HKBP Riau di patupa Pesta goarna: Pesta Gotilon. Alai pesta gotilon holan dalan do laho papunguhon pelean tu jolo do (gabe 4 hali ma mandurung), jala tingki mandurung tu jolo pintor manontor do sintuanta di jolo ni langgatani , songon na so pas do istilah i molo dibahen di Kota ate, boha do pendapat muna.