Marhata Batak Ma Hita

February 21, 2009
By

calon-penumpang-3.JPG

Oleh: Pdt Daniel T.A. Harahap

Mangihuthon UNESCO (ima sada badan ni Sarikat ni Angka Bangso na mamingkirhon taringot tu parsingkolaan, parbinotoan dohot kebudayaan), diparetonghon naeng rasip manang siap ma 2500 bahasa manang parhataan ni jolma di portibi on. Amang oi, dangol na i. :-) Holan tinggal 6000 bahasa nama na adong di portibi on jala di bagasan tolu pulu taon na parpudi lobi do sian 200 bahasa mago tu tano songon dinosaurus i najolo. Jala na binoto, hita di Indonesia on ma sada bangso na mansai mamora taringot tu bahasa manang parhataan. Lobi sian 500 bahasa adong di luatta Indonesia na maragam on, jala dua ratus sian i di Papua do ingananna.

Beha do bahasa Batak sandiri? Nunga leleng sai binege holso dohot sarita ni angka natuatua lam tu otikna nama angka sundut na umposo na mangantusi hata Batak. Ra satolop do hita disi. Sungkunsungkun di rohaniba: boasa? Boasa ndang dihasiholi angka naposo jaman nuaeng be mangguruhon hata Batakta i? Jala angka natuatua sandiri boasa ndang diharingkothon mangajari ianakhonna asa diboto marhata Batak? Ai molo sai dipasomalsomal nasida marhata Batak tu ianakhonna sian na metmet (unang holan di tingki muruk) tontu diantusi dakdanak i hata Batak i nang dung balga ibana, jala lam holong ma rohana di adat batak i?

Na mansai manggunjal tu rohaniba, ai holan HKBP do disalahan angka halak Batak i taringot tu lam magona hata batak i. Ai hira holan HKBP do na ingkon manjagahon hata batak on asa unang mago. Hape halak Batak i sandiri ndang diharingkothon hata batakna. Boasa hudok songon i? Godang do koran nang majalah na manggoari dirina Batak. Alai didia ma diboto hamu adong koran manang manjalah na marhata Batak? Manang beha pe dao do tumabo jala umsangkan (bahasa halak sidelan: lebih afdol) do manaringoti ngolu dohot roha ni Batak mamangke hata Batak. Angka buku na marhata batak sandiri mansai maol do nidapot. Molo tung pe adong, holan taringot tu adat pardongansaripeon manang hamatean nama digurathon disi. Hape molo naeng martahan jala lam tu majuna do hata Batak i ingkon gabe “bahasa tulisan” manang “parhataan na ginurathon” do hata batak i, ndada pe asal dihatahon sambing. Ala nii mansai las do roha niba di usaha na binahen sada dongan ima St Patuan Simatupang naung menterjemahon buku Purpose Driven Live na tarbarita i tu hata batak.

Hea do hudok tu sada dongan pandita asa dibahen nasida blog na marhata Batak. Mansai langku do i songon panggang karo i, ningku tu nasida. Olo, olo do ninna, alai sahat tu tingki on ndang marnasaut. Ndang na so olo iba mambahen blog marhata batak. Alai tinanda do diriniba, sipata hallang do hata batak niiba. Beha ma di Medan do iba sorang jala magodang, jala najolo marhata Melayu do sude halak hita na di Medan. Tuani ma sanga iba tinggal di Pulomas na uli i, ima parhutaan ni bangso i di Jakarta habinsaran, gabe binoto marhata Batak nang pe sipata hurang ampit. Sai marpanganju ma angka natuatua na umbegesa. :-)

Dohot jempek hudok ma: beta hita marhata batak. Ala so adong dope blog na marhata batak, di jabunta on bahenonta pe bilut hata Batak. Ai harugian bolon do hita saluhutna nang di hajolmaon pe molo mago bahasa batak i sian portibi on. Asa unang mago manang rasip ingkon ujionta do mambahen hata batak i ndada holan “bahasa lisan” (panghataion, pollung, kombur) alai dohot do “bahasa tulisan” (panuratan). Beha didok rohamuna, Dongan? :-)

Horas pitu hali.

NB (naporlu binoto): sude alus manang pandapot tu na disurathon di ginjang ingkon marhata batak do! :-)

________________________

angka istilah:

rasip, siap = musnah, punah
gurat = goresan, coretan
gurit = tulisan cukilan di bambu
manggunjal = bergejolak
pollung = omongan kosong

Kembali ke halaman depan:

Share on Facebook

43 Responses to Marhata Batak Ma Hita

  1. Yunita Panjaitan on February 21, 2009 at 12:41 pm

    satuju Amang, more than agree.. ;)
    molo dang naposo dohot dakdanak na manorushon bhs batax -our original mother tongue- who would be?
    molo mago annon / holan di bonapasogit dipake, similar to previous saying, it will be great loss for our national heritage.

    maap campur”, krn blum mgerti benar padanannya dlm bataknese language :-}

    menurut Sy Amg, start from your own home, by each family learning this custom, automatically it will be personal identity.
    Contohnya kami, bersaudara lahir & besar di Jkt tapi dibiasakan Mama-Bpk & Klrg besar berkomunikasi dgn bhs Batak. Hasilnya, berawal dari kecil jd pasif listener, mulai try to speak marpasir pasir, kadang marbatu >_
    nita jait

    ps : paling enak marhata batak kalo lg di negeri org X-)
    bener deh, yakin pd mengalami perasaan yg sama. jd bs diskusi dgn bebas, lancar & terbuka! ^_^

  2. Hodner L T on February 21, 2009 at 12:46 pm

    I ma da, iba pe dohot do lomos, boha do tutu ujung ni “hata batak” on haduan molo lam otik jolma marhata Batak. Olo do ra gabe mago, songon na dibondut portibion. Na boi ulahononta asa tongtong arga hata bataktai, tutu do nanidok ni Amang Panditai, sian jabu do mulana. Molo Gareja dang apala tarsalahon, molo ikkon gabe marbahasa Indonesia. Pas do nidok ni Amangi, di rumametmet on ma tabaen sada bilut naikkon marhata batak asa adong dalan padimunhon hata Bataktai. Mauliate jala Horas!

  3. yusuf on February 21, 2009 at 1:13 pm

    olo tutu amang, tung mansai denggan do usul ni amang panditai, alana molo binereng muse di parserahan on sebenarna boi do i manjadi bahasa sandi sesama akka batak, tarsongon halak sina rupani molo sama-sama halak i pittor marhata sina do gabe boi di jual nasida halak na asing.

    Tarlumobi surat batak ai tingki sd do najolo ni parsiajaran surat batak jala tingkos do nidok ni amang i songon na maol do luluan angka bungku surat batak dohot bahasa batak.

    Jala molo songon poda,hata hata songon falsafah hidup ni halak batak ,akka uppama nungnga lam godang mago, hape sebenarna halak batak pe molo di ikuti aturan pngkataian, hata dohot panggoaran ni saluhut angka hatai tok godang do na denggan jala mansai halus huhut dalam artina.

    Molo di angka halak sina rupani gabe di baen halaki doi gabe sada parsiajaran,sada parbinotoan na arga asa mambaen semangat angka na umbesa hape hita gabe lam godang do maila marhata batak…ala niaha olo dora ala na jungging jala jukkat godang angka donganta jadi gabe mabiar halak mamereng hita hape nian dang sude na jukkat alai ima huroha gabe unggodang do di bereng angka naasing hahurangan i.

    Taringot do iba di hata molo mamereng si malolong mangan simangkudap,mangalakka simanjojak, manghutti simajujung tung mansai halus do alai roma hita jolma naparpudian marlomba ma asa boha mambahen asa kasar-kasar marlomba asa haru mandoit ninna..amang tahe.
    Jadi satolop doiba di usul ni amang i asa lam malo hita marhata batak jala molo adong angka nampuna ilma batak boi ma marbagi asa rap mambinoto iba. horas ma

  4. Jimmy Simanjuntak on February 21, 2009 at 1:22 pm

    Horas mardongan tabe ma tu sude hita na manjaha blog-on. Mansai las do rohangku manjaha barita on ala adong dope di rohanta mamingkiri adat dohot habatahonnta i, alai huhut do sungkun2 di bagas roha, boha do bahenon asa unang mago i sude. Ra taboto do umpama na mandok “di mana langit dijunjung di situ tanah dipijak”. Ra ido sada ala umbahen lam moru parbinotoan ni angka sundut na umposo taringot tu habatahon. Godang do angka anak dohot boru ni halak batak na mangaranto di parserahan, alai sahat di si ndang pintor mardomu tu angka halak batak naung parjolo ro tu luat i. Godangan do na gabe maila molo mardongan tu halak batak sian halak sileban, nang pe halak batak ibana. Jala songon na maila do halak batak na di parserahan marbahasa batak sian bahasa na asing. Sada alasan na jotjot binege i ma ndang dipake bahasa batak di perkuliahan manang di parsikolaan.

    Jadi molo masukan sian ahu i ma molo boi angka dongan na parjolo di sada luat parserahan ingkon huhut do manogu-nogu jala paingothon angka halak batak na baru ro tu luat i asa unang dilupahon habatahonna i. Jala molo boi angka natua-tua pe sian huta huhut paingothon asa unang lupa marparsaoran tu angka punguan margana be huhut unang lupa mangalului garejana na nidohotonna di huta hian, unang gabe manimbil marminggu tu gareja na asing no boi mambahen lupa hita tu adat dohot habatahonta i. Tu amang Daniel, molo boi nian bahen hamu ma nanget2 sada blog na marbahasa batak, anggiat boi lam gumodang na angka naumposo marsiajar taringot tu habatahonta i.

    Daniel Harahap:
    Ndang na so olo iba mambahen blog marhata batak. Alai niokuhon ndang parhata batak na polin ianggo iba on. Sahat tu saonari ndang hea dope iba marnipi mamangke hata batak. Ima tandana ndang “pardila batak na tutu situtu” iba on. :-) Di tingki dakdanak di Medan marhata Indonesia do hami di jabu ala di perkebunan do natuatua i mangula. Dung pe tamat sian SMA jala di Jakarta asa ginuruhon hata Batak. Alai nunga denggan na tabahen on. Tapasomal-somal ma muse marhata batak di internet on. Mansai godang do i labana.

  5. Rudi Juan carlos Sipahutar on February 21, 2009 at 2:27 pm

    Alai Tahe, Gabe songon na borat do iba mangalusi postingan on. Lomos do tangan manuratton hata sakkababa, sotung gabe sala ma lapatan na.
    haru manjaha hata batak pe mongap-mongap do pe iba.

  6. pasaribu_t on February 21, 2009 at 2:27 pm

    kesadaranta mamake hata batak hurang dope

  7. santiyoosie on February 21, 2009 at 3:36 pm

    Horas pitu hali…
    (maksudna horas setiap hari do khan amang,sian ari senen sampe ari minggu) attar songoni mi mangatusion dihora horas pitu hali..

    Tutu ma atong amang… mansai tabo do marbahasa batak….alai sipata do lupa au marbahasa indonesia tu customerhu haruar hata batak sakababa..bingung ma ibana..jala diparekkeli dongan na hundul dilambungki ma au..ai customer hi halak jawa. ha..haa… alai gabe tambah kompakkk

    Daniel Harahap:
    Ndada na mangajari alai boi do ra masipaunean. Asa umampit niuji ma jolo paunehon saotik suratmuna (CMIIW eh PAMS: patingkos ahu molo sala hahaha)

    Horas pitu hali…
    Lapatanna horas ganup ari do khan, amang, sian ari senen sahat tu ari minggu? Attar songon i do pangantusion niiba di hata horas pitu hali!
    Toho ma i amang… mansai tabo marhata batak… alai sipata olo do lupa iba marhata indonesia tu angka panuhor i, ndang tinagam ruar hata batak i sanghambaba, longang ma ibana, jala diparengkeli dongan na hundul di lambunghi ma ahu, ala panuhor i halak jawa do. hahahaha alai gabe tamba solhot ma iba.
    Beha do, dumenggan do molo songon on? :-)

  8. Carter on February 21, 2009 at 3:57 pm

    Denggan do i amang, asa luhut halak hita boi marsiajar, jala sian blog na naeng di bukka i godang dapot informasi taringot perkembangan, hata batak ,aksara batak dohot lan na asing na marpardomuan tu bangso batak. horas madihita sude.

    Daniel Harahap:
    Beha do molo ho na mambahen blog batak i? :-)

  9. Anthoni Panjaitan on February 21, 2009 at 6:53 pm

    taringot tu lam mago na hata Batak i, terutama tu angka naposo / naumposo dohot dakdanak boi do saotik berperan huria na godang halak batak ruas na.
    saonari molo ta bereng di angka parmingguan di ganup huria, adong do na marhata batak, adong na mar bahasa indonesia ima na manogot.
    jadi di parmingguan na mar bahasa indonesia i, gumodang do naposo dohot remaja na ro, alai sude tertib acara, ende, jamita na marhata batak. Boha molo dibahen sintua na maragenda i ayat ni epistel i dohot do dijaha hata batakna. Ende na pe sahali-sahali di bahen sada manang dua ende na marhata batak. Songoni nang tu amang pandita na marjamita, boi do di “selip” hon hata batak dohot lapatan na di bahasa indonesia, asa lam mananda nasida tu angka istilah2 hata batak.
    Boi do dibahen tingki di parheheon naposo lomba pidato marhata batak, lomba koor na ende wajib na logu batak dohot angka acara na asing na hombar tu tujuanta i…

    Daniel Harahap:
    Manungkun jo tahe: ndang tugas ni natuatua mangajari ianakhonna marhata batak? Boasa gabe tugas ni huria? Tugas ni huria mamaritahon barita na uli dibagasan hata na mansai diantusi jala dihangoluhon ruasna i do. :-)

  10. Anthoni Panjaitan on February 21, 2009 at 7:33 pm

    Jadi parjolo do nangkin hu dok, BOI do SAOTIK berperan …du.
    lapatan na disi dang ingkon manang holan tugas ni huria, jala dang sude jadi kewajiban ni huria (molo tung pe na olo manang dilehon rohani pangula ni huria na mayoritas ruas na dohot goar ni huria i pe adong hata batak na). Tetap do kewajiban ni natoras na laho mangajari, dohot manogihon angka dakdanak na mananda adat ni batak. Hata batak i merupakan sada kebudayaan, jala ndang maralo tu asas ni huria molo adong program ni huria di bahen laho melestarikan kebudayaan na adong, terutama berhubungan tu huria i.
    Molo songon hurianta HKBP, molo di bahen parmingguan marhata batak holan atas dasar asa diantusi barita na uli i, boi do piga-piga pulu tahun na ro, di parmingguan marhata batak holan parhundulan na di jolo na ma na marisi halak. Jala gabe songon na hurang tabo di bege huria ni batak alai dang adong be ruas na na mamboto hata batak.

  11. Panca Bonar on February 22, 2009 at 8:28 am

    Boasa adong ancaman tu hata batak di ari nanaeng ro? on ma na porlu si patolhason molo naeng patureonta asa unang mago hata batak i haduan. Hira-hira aha ma i? molo pamingkiran nami on ma na gumodang alus ni dongan molo marhata batak iba :

    Maila ( Lo jangan ngomong batak dong , gue malu tau…soalnya teman gue banyak disini, gengsi tau , ima alus ni dongan molo marhata batak iba di sada pesta manang punguan na ribur)… maila gabe halak batak Boasa?.. on muse porlu dirimangi jala porlu dikarejoi

    On ma naporlu “gerakan” sibaenon ta : Unang maila ho gabe jolma….. uang maila ho gabe dirim…. uang maila ho gabe sahalak Batak……….

    Sada sibaenon magatasi parsoalan on : totop ma hata batak dipakke gabe hata pangantar di jabu , jala diusahahon ma tiap ari sabtu mangajari rongkoman batak dohot marturi-turian tu angka ianakkon, jala nunga hudalanhon hami sandiri i tu bere dohot ianakkon nami, ala dang dapot nasida di parsikkolaan na be, na kebetulan marsikkola di Theresia dohot di Sikkola Palito Pangkirimon.

  12. Panca Bonar on February 22, 2009 at 8:41 am

    Tutu do i amang pandita, dang tugas ni huria mangajari hata batak, alai dang pola rugi ra molo dibaen huria i “strategi” : a ha na ra ta ba wa i ma nga la pa sa da ga ja , pangolat tu akka daknanak na marguru malua songon sada “syarat” malua sian panghakkungi ate.

  13. elumban on February 22, 2009 at 3:39 pm

    Konon…tarbarita do halak Batak (ditingki-tingki nasalpu) maila molo habotoan halak Batak. Molo tung pe adong sungkun2 “eh orang batak ya..?” antar maila do halak hita mangokuhon na Batak ibana, antar songon on do jotjot alusnya.”Ya sih…tapi sudah lama di Jakarta, ngak bisa lagi Bahasa Batak”…Di pangalaho sisongon I adong do sada carito ni dongan na mambahen mengkel iba.

    Tar di pamungka ni taon ualupuluan, laho ma donganon rap dohot dongan nasida mardalani tu surabaya. Di tingki ni ra da tung godang dope angka naposo ni Batak na tubu di jawa songon tingkion. Bah molo pajumpang iba dohot dongan naposo, boi dohonon BTL asli dope I, boi ma ra ala nanaeng sikola do tu jawa on. Jala tung mansai las do roha pajumpang dohot angka dongan Batak diparserahan on. Di pardalanan nasida ditingki marbus kota, pajumpang ma nasida dohot dua namarbaju na “sangat meyakinkan” pasti boru Batak do nasida – ai antar marsuhi-suhi do pe bohi I. Pas muse antong hundul ibotonta na dua I di bangku na dijolo ni kedanta na duai. Bah, songon na halak hita do itoan na dua on, ninna roha ni kedanta on, dipingkiri ma angkal asa boi masitandaan dohot itoan na duai. Dohot “roha na tulus” jongjong ma kedantaon laho mangantoi ibotonta na dua i, ninna ma :”santabi Ito, na baru ro pe hami tu Surabya on, ai dia do tahe dalan tu perak?”. Tarsonggot ma ibotonta na dua on, jala songon na maila ibana diantoi halak dohot bahasa batak, pintor didok ma..”Maaf ya, kita tidak mengerti Bahasa Batak..Pintor songon na kete hian ma di hilala kedanta on di alus ni itoan on. Sial hian dihilala ibana, songon na so boi dijalo ibana pambaen ni itoan I..”Bah anak siantar…ninna rohana”, ai bohama si Jugul hian do kedanta on tingki di siantar. Dilului ma angkal “mangkarejoi” itoan i. Ninna ibana ma tu dongannai, marhata Batak ibana, jala antar gogo didok asa dibege iton i:”Songon na bau ate…na m*nt*t do huroha itoan on” ninna ibana. Mambege i, pintor jongjong ma ito an on, jala gogo suarana..”Eh…aha didok ho, dang ahu i dan…dang m*nt*t ahu…” Ninna itoan on tudu-tudu tu kedan on….mengkel suping ma kedanta nadua i.

    Hira-hira songon i ma parmago ni bahasa Batak i sian hita halak Batak, tarlumobi na diparserahan on, maila hita mangkatai dohot bahasa batak di jolo niangka dongan na so Batak molo rap hita dohot dongan Batak, hape halak jawa, manang sunda bebas do nasida mangkatai dohot bahasa nasida manang didia pe.

  14. DSB on February 22, 2009 at 7:59 pm

    Aha do tahe hata Indonesiana “Raja na songkal i”. Ai songon na so tabo do mangendehon ende molo dang binoto lapatan na. Ai adong do tahe kamus hata batak? Tudio do luluan? Tu Ohio do? Molo so adong dope kamus hata batak, bah gabe sada peluang bisnis do on. Ise na olo?

  15. Tomos Butarbutar on February 23, 2009 at 5:07 am

    Gabe taringot iba tingki singkola SMP di Sipoholon. Dang haru malo dope iba marhata Indonesia, jala molo marhata Indonesia iba songon na geok do panghilalaan. Godang do angka dongan di parsingkolaani na marhata Indonesia, tarlomobi mai angka dongan anak manang boru ni Pandita sian Seminarium (Simanare) Sipoholon. Gabe dang barani iba manghatai dohot nasida, alani i do ra binna so gabe marboru ni pandita iba, hahaha.

    DPPHB (dang pola porlu hian botoon); inang boru Siregar pandita di Bekasi ma dongan sakalas ni iba tingki i di SMP Sipoholon.

  16. eric arac on February 23, 2009 at 8:27 am

    Songon na guit do roha naeng dohot marsiajar hata Batak on.
    Adong do ra siparrohahononta na boi ulahononta molo naeng marhata Batak hita, angka parsiajar songon ahu on.
    Isarana:
    1. Unang maila hita.
    2. Malo hita mameakhon hata Batak i di inganan na. Na dumenggan ma i
    tapangke di parsaoran ni halak Batak. (Pesta Batak, Punguan Marga,
    Arisan Ompu/Tutur, Parsahutaon, Partangiangan, ‘blogg’ -aha do tahe
    hata Batak ni on- dohot na asing)
    3. Tapasomal ma mandok manang manurathon sada pandohan -sada
    kalimat- dibagasan hata Batak sude, unang tapasomal padomuhon
    manang manolothon hata na asing. Huria i pe ra boi do songon i. Dang
    holan HKBP, dohot ma GKPI, HKI, dohot na asing. Ditingki
    parmingguon hata Batak, marhata Batak ma, tingki hata Indonesia,
    marhata Indonesia ma, tingki hata Inggris, marhata Inggris ma.
    4. Unang mabiar hita marsiajar, laos mamungka marhata Batak. Songoni
    tu angka dongan, nang natua-tua naung malo jala pistar marhata
    Batak, olo ma nian mangajari dibagasan serep ni roha.
    5. Adong do hea huida bungku Kamus Batak Toba – Indonesia, jala adong
    do huboto dua nari bungku na mansai lehet pangkeonta laho marsiajar
    hata Batak. Bungku i dang maol dapot hita. Ra olo do nunga adong i
    di bagasta be.
    Anggiat ma marsitutu hita sude halak Batak laho padimun-dimunhon
    angka na denggan i, marhite hata Batak ta i. Mauliate.

    Daniel Harahap:
    Huingot ma tingki mangula iba di Rawamangun. Ro ma sada pandita na imbaru mangokuhon tu pandita resort na so diboto ibana marhata batak. Alai aha ma didok pdt hutahaean, pandita resortnami tingki i, “ndang pola boha i, asal ma diboto ho marhata Indonesia”. :-) Lapatanna: adong do halak ndang diboto marhata batak alai marhata indonesia pe ndang tingkos. :-)

  17. yosevanny on February 23, 2009 at 8:36 am

    horas di hita saluhutna.

    satuju do iba molo sahali2 marbahasa batak di blog-on.
    ai sipata adong do sihol naeng marhata batak.
    alai pasering hu pe sala do ra ate. songon iba, sidung martelepon dohot natua-tua i, tompu di antoi dongan sakantor iba, ga hata batak do binahen alusna, :) hape so diattusi ibana, nga sega karesek hehehe :)

  18. JP Manalu on February 23, 2009 at 9:24 am

    Pro : Amang (Inang) DSB,
    Tahun lalu saya baru membeli kamus Batak Indonesia dari pameran buku di Solo, terbitan Erlangga Jakarta, karya JP Sarumpaet dari Melbourne University, semoga membantu.

  19. Agus Karta Parulian Panggabean on February 23, 2009 at 9:35 am

    1. Molo ndang ringkot rohanta mago hata Batakta i, ba taajari ma hata Batak i tu angka ianakhonta, amang naposonta, berenta, dna.

    2. Molo adong donganta na marpasir-pasir dope hata Batakna, unang pintor aha rohanta mida nasida. Ingkon argaonta do keinginan nasida marsiajar hata Batak i nang pe adong hurang-hurangna. Ai sian i boi do idaonta keinginan nasida melestarikan hata Batak i.

    3. Molo maila hita mengakui dirinta sebagai orang Batak, ingkon asing do dirinta sian halak Batak na torop i. Unang ta tangko barang ni halak, unang pabungabungahon hepeng, unang holan na mabuk manang marjuji ta ula i, unang gogo-gogo soaranta molo manghatai, unang kasar hita melayani halak na asing.

  20. t.m.sihombing on February 23, 2009 at 10:28 am

    Memang ingkon dipasomal-somal do marhata batak di jabu jala adong kemauan, anggo soadong do kemauan ba kecintaan tu bahasa batak pe gabe mago.
    Molo binereng tu angka naposo saonnari jago-jago do marbahasa asing, boasa molo bahasa batak ndang olo / ndang boi? Na maila dao didok halak batak ? ingkon bangga do iba molo halak batak alana kualitas na boi tarpangke di sude ulaon, molo so bangga do asa dipambolokkon be angka margana.
    Memang ndang tugas ni Huria membaen asa ruas malo marbahasa batak , alai boi do mensosialisaikannya marhite mangisi sada acara di naposo bulung taringot tarombo batak, dohot acara adat batak.Di parpunguan arisan marga boi do dileon kesempatan tu angka keluarga naumposo asa dibahen nasida angka arisanna, jala di pesta partangiangan marga asa dilehon tu nasida laho patupahon bentuk acarana.

    Daniel Harahap:
    Huria manaringoti tarombo hatak? Ra on ma dokhonon: tarombo batak baru dope disurathon, ra ndang gok dope lima pulu taon. Sian sundut tu sundut holan dihatahon sambing do i. Ala nii unang marbadai ala ni tarombo. Mangihuthon na pistar holan opat sundut tu ginjang do i tarombo i na mansai sintong. Lam tu ginjang lam “golap” do tarombo i. :-)

    Huria mangajari mambagi jambar? Ah na asing ma niula. :-)

  21. Agus Karta Parulian Panggabean on February 23, 2009 at 10:55 am

    Nahinormatan Lae T.M.Sihombing,
    Porlu do botoonta bahwa HKBP ADALAH GEREJA, BUKAN LEMBAGA PELESTARIAN BUDAYA BATAK (BAHASA, ADAT ISTIADAT, SENI RUPA, SENI TARI, SENI MUSIK DLL). Jadi ndang tugas ni angka parhobas di HKBP mangajarhon hata Batak, surat ni Batak, tarombo Batak, jambar hata manang sipanganon dohot angka na asing.
    Molo ringkot do rohanta tu na nidokmuna i, ingkon bahenonta do sada lembaga na bertugas tu pelestarian ni budaya Batak. Ndang huboto manang naung adong lembaga na hudokhon on. Alai ingkon pulik do bahenonta antara Gereja HKBP selaku gereja Batak dohot Budaya Batak i sandiri.

    Tugas ni HKBP ima mamaritahon Barita Nauli i tu sandok portibi on. Ndada mamaritahon Barita Nauli i sambil melestarikan budaya Batak.

    Daniel Harahap:
    Manungkun aha do hata batak ni “lestari” dohot “pelestarian”?
    Udut? Mahaudutan? :-)

  22. Agus Karta Parulian Panggabean on February 23, 2009 at 11:01 am

    Ndang huboto amang aha do hata batak ni pelestarian. Aut sugari huboto hata Batakna, laos i do hu surathon di komentarni iba na di ginjang i.

    Daniel Harahap:
    Ndang pola boha i. Sian hata Jawa do i bongot tu hata Indonesia. Talului pe aha ma hata batak ni lestari. Ra boi do pangkeon “ramoti” na marlapatan manjagahon. :-)

  23. Asima Nainggolan on February 23, 2009 at 1:23 pm

    Mansai las situtu rohangku manjaha artikel ni Amang on bah.. Artikel na mambahen lam ringgas roha mampargunahon hata Batakta i.

    Alai ima nian, Amang. Lam tu majuna negaranta on, songoni do huhilala parmoru ni dongan generasi Batak na boi marhata Batak, nata pe na marpasir-pasir manghatahonsa alai cukup mangantusi molo mambege halak manghatai. Boasa ma hudok songoni..? Ai molo mulak iba tu huta, lewat ma sian Medan, Siantar dungi tu Parapat – nga marhata Indonesia be angka naposo i disan.. Apalagi molo binereng mulak angka naposo pangaranto tu hita an di bus, di kapal manang molo mardalan-dalani iba di huta, ba hira na parkota masuk tu huta nama panghataionna niida.. Hape apala tung pakket do logat Batakna na marhata Indonesia i ibana…. Amangoooi amang, ninna rohama..

    Sunggul-sunggul ma nian artikel on tu angka natua-tua ni halak hita, asa lam tu ringgasna mangajarhon Hata Batak tu angka ianakhonna di bagasna be. Ai molo diajarhon Hata Batak tu dakdanak i mulai sihaetehonna, tung solhot do hata i di bagasan rohana jala pargunahonnna ma torus di lingkungan pergaulanna. Ai molo lancar nasida marhata Batak di jabu, pasti lebih percaya diri ma ibana manghatai di loloan na torop.

    Martua ma ahu sebagai boru Batak, ala IKKON marhata BATAK do hami di jabu dohot di kumpulan keluarga dibaen Namboruku nang pe nunga tinggal di Medan hami hian.. Jala ikkon songoni ma muse bahenon nian di tonga2 ni bagasniba muse…

    Sahali nari, Mauliate, Amang…

  24. SN on February 23, 2009 at 1:52 pm

    Ima da amang, iba pe nga naeng satonga abad dang pola jago hian marbahasa batakon, apalagi molo manjaha bibel marbahasa batak tung soniatuson do lapatanna. Alai moo berbahasa sehari-hari iba boi ma,…….. jadi memang porlu hian do bahasa batak i, anakhon niba molo niajak marminggu siang pintor marungut-ungut do,……….. nian adong ma na taronjor rohana mambean carita bahasa batak songon ensiklopedia amang, . pasti angka dakdanak las rohana manjaha, apalagi adong gambar2 na.

  25. Barita MP Hutabarat on February 23, 2009 at 4:56 pm

    Amang Panca Bonar.
    Nuaeng manungkun ma iba tu hamu Amang. Di dia do tahe sikola Palito Pangkirimon? Songon na so adong do binoto.

    Santabi Amang, holan asa dohot ahu pariburriburhon.

  26. Rumahorbo on February 24, 2009 at 9:10 am

    Sangat setuju do au hata batak asa dipelihara, alai unang holan mandok.

  27. Friska Pardede on February 24, 2009 at 11:24 am

    Disada tingki adong acara tuborungku dijabu, jadi pas mangampu ibana tuangka namamodai ibana ala sai diajar2i amongna (ala marhata batak naparpasir2) didok ibana ma tu amongna “sip jo babami bapak boi do au marhata batak” ninna ibana mengkel ma sude jala dipatingkos ma nasalai.

    Lai amang gabe hurang hatop do aba manjaha sude angka natarsurat diginjang gabe huhulala lambat au manjaha bahasantaon gabe ungkatop iba manjaha hata Indonesia, boasa gabe songoni ate ?

    Molo hami dijabu dipabiasa hami do marhata Batak tu ianakkonnami tingki mardalan2 pe , au memang balga di Simalungun marhata Batak do mulai metmet alai amanta dijabu tubu dohot balga di Ranto Parapat do, 9 halaki sabutuha alai holan amanta do sampe sonari naboi marhata batak alana tingki marhallet dope hami maos do husuru mambaen surat tu natua tuangku marhata batak jadi gabe maloma .

    Daniel Harahap:
    Tarajumi ma angka na tubu di monas do saluhutna hita dison: ise do na boi padengganhon hata batak ni komen na di ginjang? :-)

  28. imme hutajulu on February 24, 2009 at 4:34 pm

    (setelah menulis comment di posting “Sira”)
    Ini toch asal muasalnya…

  29. DSB on February 24, 2009 at 8:37 pm

    Mauliatema di amang JP Manalu. Ai di huta ni si Obama do ahu satingkion. Huboan do Buku Ende HKBP ala lomo do rohangku marende sian buku i. Hulului do cara mangantusi “Raja na songkal i”, nga dapot be, hata Indonesia na “Raja yang maha dahsyat”

  30. t.m.sihombing on February 27, 2009 at 10:14 am

    Tu lae Agus Karta Parulian Panggabean.
    Huantusi do peran ni Huria dohot Parhalado, alana Hudok di hatangku: Ndang tugas ni huria asa ruasna malo marhata batak, alai boi do mensosialisasikan melalui acara naposo bulung, dohot maksud manaringoti silsilah batak(sumber batak), patandahon adat batak asa angka naposoi lomo rohana tu lingkungan batak. Jadi lapatan ni Ndang tugas ima bukan tugas.

  31. sara rossa on February 27, 2009 at 2:47 pm

    Horas ma dihamu Amang Pdt.nami dht disude angka nadiblog on, etak beha adong angka nagiot roha naeng marsiajar bahasa batak sehari-hari di gereja nami HKBP Kernolong, Jl.Kramat IV/37 Jakarta Pusat, nungnga dibuka kursus bahasa batak sehari-hari (gratis) setiap hari Senin mulai pukul 18.00 wib. kelas baru mulai Senin, 2 Maret 2009.

    Roma hamu sude angka nahuhaholongi hami, rap marsiajar hita, ai molo sohitabe lao mamakke bahasatta i ise be ? haru hatani halak pinarsiajaran boasa sobotoon bahasa niba sandiri ?.
    Mauliate ma dihita sude.horas jala gabe.

  32. a.l. sianturi on March 18, 2009 at 10:21 pm

    Horas ma dihamu sude. Ai songon godang do di pikiranku naeng taungkaphon dison, alai ndang pala jago ahu na marhata batak i. taringot tu na nidok (ito?) sara rossa i, boi ma ahu ro tu bagasan kursus i asa gabe “tar improve” :) bahasa batakku.

    songoni da ba, horas ;p

  33. Parlindungan Sihotang on September 16, 2009 at 7:24 am

    Ahu pe balga di Medan….toho do nian halak Batak na sian Medan songon na mahila marhata Batak…alai di jabu nami, inang pangintubu nahinan na ringgasan mamangke hata Batak, dang na holan tingki muruk, tingki mangalehon poda pe, nang martangiang, dna, torus do dipangke hatantai…alai songon parhumbang hami huhilala tingkii, asing do sebagian hata batak ni keluarga nami di tonga-tonga ni angka dongan na sian Toba na umbahat di huta nami, ima di daerah Sidorame, Medan Timur an…pas ma tingki kuliah ahu di Jember, Jawa Timur, baru ma humulai marhata batak, alani pardonganon ma i…mahila iba molo jumpang tu angka dongan batak na kuliah di huta i dang mamangke hata batak…Terus terang do iba, di pedalaman Jawa Timuran ma iba marsiajar berani dohot pasomalsomalhon marhata batak ganup ari…alai, olo do sipata angka dongan na ro sian Siantar manang Tarutung dohot Balige mandok iba unang mamaksahon marhata batak, ala marpasirpasir ninna halakki hata batak niba…on do sipata mambahen marsak tingkii, dang diantusi halak i boasa songon na maol halak parmedan marhata batak, nda na ingkon bangga angka dongan molo olo do memulai parmedan marhata Batak? jadi, saleleng kuliah dohot aktif iba di NHKBP Jember ima, mulak dohot tinggal iba di Jakarta rap dohot angka abang dohot ito, terasa ma memang, iba do na umringgas marhata batak, dungi muse, di angka arisan keluarga, songon na berbeda do dialek batak na hupangke, dang be tarbege songon halak Pakkat ahu marhata batak, alai songon parbalige nama…tingki on ma baru ma huboto ai berbeda do memang dialek dohot hata batak sebagian mangihuthon luat di hitaan hian….

  34. nandosimo on January 23, 2010 at 1:50 am

    horas amang harahap,
    ido da bah, ingkon datdat iba marhata batak. ahu sandiri tubu/magodang di pangarantoan do, ima di jawa timur. di jabu nami pe, sian na geleng ahu satonga2 do dipangke hata batak dohot indonesia. toho do na nidok ni amang i, hata batak i haruar holan di tingki muruk bapak/mama tu ahu :) huantusi do nian di pinggol, ala i songon na maol hudok alusna sangkababa di hata batak i. saonari ala ni manghombar tu angka dongan naposo/parkarejoon na BTL i, gabe malo otik do tahe.
    maila do sipata molo dongan i mandok: “Lae, songon na janggal2 do hata batakmi.”

    Alusku: “na rumingkot ima keberanian, boha bahenon :( ” – tung pe secara garis besar logatku gabe mirip orang Mandailing, bukan seperti Toba.- anggi nami na ro sian huta pe gabe so olo marhata batak. husungkun di hata batak, ala i gabe hata logat jakarta (loe – gue) do alusna. ise do na toho? Jadi unang ma lam tahabunihon hasurunganta i di tonga2ni bangso na asing on. semoga.

    selamat melayani, amang. semoga makin maju.

    Daniel Harahap:
    Horas. Manungkun, boasa parpudi laho mandok selamat marhobas gabe marhata melayu muse hamu? :-)

  35. Bilson Simamora on January 26, 2010 at 10:40 am

    Satolop amang. Horas

  36. ivana br hombing on February 7, 2010 at 1:02 pm

    toho do i amang.ahu pe setuju do disi.boha pe inna hata toba i prlu doi jala sada kekayaan budaya indonesia na porlu dijaga.hita na angka nadipangarantoan molo pe nian hita jumpang dohot halak batak i.marhata oba be ma hita.jonok.hona gabe songon di huta.jala naposo ni batak godang naso umbota adat2 batak.termasuk ma ahu disi.ale sada nahumaulatehon hata toba dohot aksara batak ingot dope ahu disi.jala ingot dope ahu apalagima di huta nami angka pastor2 sian negara2 asing tung mansai malo do halaki marhata toba,marhata toba do halakon tu halak hita i,dang marhata indonesia. boha muse ma hita jumpang dohot halak hita?

  37. Arasmi Simamora on March 12, 2010 at 9:49 am

    Dang holan hata batak i be naso lomo rohani angka dakdanak saonari tarlumobi ma naung lahir di kota, dohot do nunga tu sipanganon tradisi nihalak batak termasuk mai saksang (juhut) nunga godang angka dakdanaki naso olo mangallang. Gebe ullomo nunga rohana mangallang angka satei.

  38. Marnaek Rumahorbo on July 17, 2010 at 9:34 am

    Horas !

    Sabas hian poang ni bassa akka na tarsurat on, tung massai las situtu rohakku.
    ai godang dope akka dongan na hinaholongan na tung massai pakket hian marbahasa batak.
    gabe sombu sihol poang tu bona pasogit.

    mauliate ma dihamu Amang Inang …
    tarlumobi tu Nampunasa Jabu on …

    Horas Jala Gabe

    mardongan holong
    Marnaek Rumahorbo

  39. paulus pudi on January 16, 2011 at 1:13 pm

    HQRAS MADIHITA SASUDENA.Ba pangidoan ba rap manjagama hita asa unang magoi hata batak tai,unang maila hita marhata batak dohot halak batak ,tungboha tabahen dangboi tatabunihon i, sian rumangtape matarida do,bohi marsuhi-suhi,longat bahasa indonesia nape marpasir-pasir.jala na bahat nabinoto anak boru ni halak hita do gumodangan namaila gabe boru batak,hape hira-hira tolu bulan dope di jakarta,jala karejo di konpeksi do itoan ni molo ni antoan on soi nama sombong na.Jala molo tabereng do tu jaman saonari on bahat nai boru halak hitai nagabe marhasohotan tu halak si leban ni.molosinungkun nasi da ahama didok ‘OGAH AH’ kawin ama orang batak, adatnya repat,orangnya galak galak.jadi di hita saluhtna bangso batak bangso nabolon ,barappak mahita manjaga hata batak tai .H O R A S… Madihita saluhut na. molo adong nahurang lobi,masiantusan mahita ba na mar siajar do hita kan. 8| :p

  40. Ridyard Marbun on January 22, 2011 at 12:11 pm

    Huuji ma jolo patingkoshon na sinurat ni inanta Boru Pardede di toru on:
    ===================================================================
    Friska Pardede on February 24, 2009 at 11:24 am

    Di sada tingki, hubahen hami ulaon (‘las ni roha do ra maksud ni inanta Br. Pardede’) tu boru nami (‘ai dohot do amanta nampuna boru kan? :-) ‘) di jabu (bagas) nami, di tingki mangampu ibana tu angka natua-tua na mamodai ibana, ala sai maos dipatingkos amongna pangkataionna (ala naparpasir2 hata batakna), didok ibana ma tu amongna: “sip jo babami bapak boi do au marhata batak” (dang pola siediton be on, ai asli do ra on dihatahon), ninna ibana. Mengkel martata ma sude natorop i, dung i dipatingkos ma nasala i.

    Alai amang gabe hurang do hatop niba (ni iba) manjaha sude natarsurat diginjang i, gabe lambat do huhilala au manjaha hata batakta on, ungkatop (humatop) iba manjaha hata Indonesia, boasa gabe songoni ate ?

    Molo dijabu hupasomal hami do marhata Batak tu ianakkonnami tingki mardalan2 pe , memang balga (magodang) di Simalungun do au jala marhata Batak do mulai metmet. Alai amanta dijabu tubu (sorang) jala balga (magodang) di Ranto Parapat do, 9 ma nasida marhaha anggi, alai holan amanta do sahat tu saonari na boi marhata batak . Alana, tingki marhallet (mardongan) dope hami maos do husuru ibana mambaen surat tu natua-tuangku marhata batak, jadi gabe malo ma .
    ==================================================================

    Sian i tarida, ingkon dumenggan do pangkataion na sinurathon unang apala pangkataion na hinatahon. Molo hinatahon do, sipata pintor masiantusan do na mangkatahon dohot na umbegesa nangpe adong na sala pandohan. Alai molo disurathon i, olo gabe sala pangantusionna. Isara ni “sabutuha”. Molo dihatahon, pintor mura do antusan, alai sinurathon gabe sala do.

    Anggiat ma tutu lam tu hembangna hata batakta on, jala lam tu toropna (halak batak manang halak na asing pe) na mamangke hata batak. Mauliate ma.

    Ridyard Marbun

  41. Rufinus Nainggolan on August 19, 2011 at 8:26 pm

    Mauliate amang Pandita,
    Nunga dilehon hamu tutu sada parbue ni pikkiran na laho pamaju ni halak Batak tai, ingkon sude ma neang mangoloi, mangamini dohot mampeopsa tarlumobi ma neang pambaenan. Asa boi i gabe tarpature tarlumobi ma nean halak Batak ingkon mangulahon Dalihan Na Tolu – tai. Unang be kaluar hata na so tingkos di sude ulaon dohot siganup ari. Ingkon tajalo do na mura do halak Batak mangkatahon hata-hata na so tumba na. Molo minum tuak sahat tu na mabuk, pintor modom ma. Jala na umporlu, asa sude ma neang na gabe Bupati dohot parhobas na, sude pandita dohot pangula ni huria, angka Bius…boi ma nean rap hundul na laho mangarapot tu si. Ingkon bahenon ma surat Batak i di lambung ni surat Indonesia, molo boi dohot hata Inggris. Boi do dos rohanta???

  42. Rufinus Nainggolan on August 19, 2011 at 8:33 pm

    Dalihan Na Tolu i ma urat-bona ni ngolu ni halak Batak na mangajarhon: Somba ma tu hula-hula (tongtong ma hita martarombo jala tarahut partuturan), Manat mardongan tubu dohot marale-ale, jala elek marboru. Tabahen jala tabuat partuturon na jumonok. Unang taoloi martongkar. Horas tondi ma dingin, pir tondi ma togu!

    Beijing, 19 Agustus 2011 :20.40(tingki Indonesia)

  43. tari on October 30, 2013 at 1:47 pm

    Horas
    sai las do roha molo adong dope hita na umposo olo mamikkiri hamajuon hata batak dohot budayana.
    hami sian organisasi naeng mambaen natal marhata batak dohot marmusik uning2an. Alana hami pe sihol do raha nami hita sundut naumposo boi melestarikan hata dohot budaya batak. mauliate

Leave a Reply

Your email address will not be published. Required fields are marked *

*